Erbare, unnd wollweise, grosgunstige, gebietende hernn, e. erb. w. habenn sich noch ungezweiffeldt gunstiglich zuberichtenn, wie das gegen e. erb. w. wir unns vorschienenn jahren vast hochlich beklaget, ob woll die havenn Ostenforth^a inn Ißlandt belegen, so wir nun in die 80 jahr, auß dieser gutenn stadt besiegeldt, und dieselbigen mit allerhandt kauffmans wahr, so dero ordter nottrufftich, der gebur vorsehenn, und vorsorget, vonn der kun. matt. zu Dennemarcken (nach inhaldt ingelechter copeien¹) unns gnedigst vorschreibenn unnd eingereumet worden.

Das doch, uber alle unsere zuvorsicht, das originall solcher vorschreibungh, unns schadhafftig wordenn,² also das wir, umb kunfftige weiterungh zovurkommen, unsere nottrufft zu sein erachtet, umb renovation und verneuwerungh obangeregter vorschreibung so auff unsern dohmalß gewesenen schiffer, Berendt Losekannen gerichtet, undterthenigste ansuchungh thun zu laßenn.

Bittenn demnach dienstlich, e. erb. w. sich gunstiglich nicht beschwerenn wollen, durch derselbigen beforderungs schriffte, bey hogstgedachten kun. matt. uns gunstiglich zuvorbittenn, darmit unns solche hiebevor gnedigst mitgetheilete vorschreibungh,³ auß obangeregten ursachenn, auff itzigen unsern schipffer, Christoffer Meiger, gnedigst renoviert, unnd erneuwert werdenn muchte.^b Seint wir des unterthenigsten erbietens, gegen ihre kun. matt. unnd derselben undterthanen unns des orts dermaßen henwiderumb^c zuerzeigen, das, unsers undterthenigsten hoffens, ihre kun. matt. deßen ein gnedigst gefallenn tragen werden.

Das vorsehenn zu e. erb. w. wir unns dienstlich, unnd seint es umb dieselbigen, bestes vermugens, inn schuldigen gehorsamb widerumb zuvordienenn erputtich unnd willig.

E. erb. w.

dienstwillige unnd gehorsame

Christoffer Meiger,
Johann Wiggers,
Johann Reineken,
burgere sampt anderen schiffsredernn.