Nevennst wunschunge gottliger gnadenn, geliuckseliger reise, und alles gudenn thovorn, danncke ick ju fruntlich des thogeshickeden unnd verehredenn drogen Wesser laßes, were in warheit, dewile it unverschuldet, nicht nodig gewesenn, woldenn ock thwar nicht anngenommen, wan he dem boden, wedderumb tho riugge tho dragenn nicht were beschwerlich gewesenn, belanngende des impaßes in juwen haven in der Ostfiorde up Islanndt vann denn Hamborgernn geschenn, vernehme ick ganntz unngerne, unnd verwundere my nicht weinig, dat gi mi der Hamborger nahmen, so in juwenn haven kegenn der kon. m. verschrivunnge ingelopenn, ock nicht de tidt, wennehr se ju denn impaß gedahnn, nu mit dißem bodenn, nicht anngethoget hebbenn. Unnd dar ghi noch in der ihle, insonnderheit ehr, die Islanndtsfahrs vann Hamborch afseglenn, dersiulvigenn Hamborger nahmen, mit sampt der tidt, erclerenn willen, scholen ehnn de haven henforder tho beseglenn, so vele moglick verboden, unnd se vor juwenn schaden, ehres modtwilligenn ungehorsams der billicheit gestraffet werdenn, ju ock sonnstenn tho denenn, si ick mynem weinigem vermogen na gudtwillich, ju hirmit gott bevhelenndt. Datum Clintstorff denn 6 aprilis anno 1582.

Johann Bockholt