15621026BRE00

1562, October 26

[Bremen]

Johan Runge to Bremen: complaint against Segebad Detken, who has used the harbour Baltasound in Shetland, which was used by Runge with permission of the governour of Shetland the previous year, and refused them entry. Being unable to trade in Shetland, Runge then set sail for Bergen in Norway, under great losses, and demands a compensation of 400 daler.

Created for and published on the HANSdoc website of the German Maritime Museum, Bremerhaven, by Bart Holterman in the context of the research project Between the North Sea and the Norwegian Sea: interdisciplinary Studies of the Hanse. Licensed CC BY.

Bremen, Staatsarchiv der Freien und Hansestadt Bremen

2-R.11.kk.

One bifolio

21x31,5cm

Paper

Modern foliation in pencil, 8-9.

Final version

Low German

On the back: Productum den 26en octobris anno etc. 62. Terminus 14 dage.

15621026BRE00SAB0

Shetland Documents 1195-1579, no. 140 has an English summary of the document.

Petitio sententiaria Johann Runge unnd siner principal mitkleger, contra Segebadenn Deitkenn unnd syne mitbeclagten.

Vor iw erbarnn wolwisenn hernn borgermeyster unnd radtmannen der stadt Bremenn, ordentlichenn richterenn, erschine ick Johann Runge, alß schipper und vann wegenn miner schepesfrunde Gert Westerwolt, Hinrick Vaget, Carstenn Luers, Hinrick Koster, Hinrick Eggers, Hinrick Ladiges, Bartolt Meyer, Roloff Segelckenn, Johan Cordes, vor welcke alle ick ßo noedich, cautionem de rato to donnde erboedich, alle principal klegere, jegenn unnd widder Segebade Detkenn, Dirick Voegenn, Johann Michell sampt beclagtenn, oder ßo jemannd ohrenthalvenn in dusser sacke gefulmechtigt, vor i. e. w. sick to rechte inlatenn wert, nicht in gestalt eines irlichenn libelli, sunder velemehr mit ertellunge togedragenner handlung in modum simplicis querele, mick widder desulvige beclagennde, mit bitt de benompte reos conventos dar up denn gerichtlichenn krig to befestigennde und boerliche antwort intobringende antoholdenn. Offt woll inn sick waer unnd denn beclagtenn bewust, dat to behoff mines schepes unnd schepesfrundenn anno 1560 inn Hitlannd vann dem hovetfagde unnd kemener darsulvest Oloff Synckeler, eynne have Balßhundt gehetenn in Unsthe gelegenn erlanget wordenn,1 darinne sunder jenigenn widdersproch eynnes anderenn to kopenn unnd verkopenn, wo alda des lanndes gebruck, des wy ock fernner alßo folgennds glick anderenn Bremernn unnsenn landsludenn (alles inholt der verschrivinge) scholdenn to genetennde hebbenn, aldewile wy denn tollenn glick annderenn uthgevenn unnd betaldenn vergunstiget unnd verschrevenn.

Darup wy ock folgenndes jares 1561 inn de have gelecht aldar unnser kopenschup gebrucket, unnd ohre verhinderung imannds gebruckenn latenn.

Nichttomin hebben de upgedachte beclagtenn, denn solchs bewust gewesenn, sick gelustenn latenn, dusses jegenwardigenn jares unns dar uth to entsettenn, unnd do wy ann de have gekamenn, se vor unnß darinne gefunden, dar uth geholdenn, gar unnd alle nicht by sick geduldenn willen, alßo dat wy ohnne de negest byliggennde eylande Jelle unnd Vetteloea ock rhuemenn moetenn, unangesehnn wy up dat frundtlichste gebedenn, als eynner stadt borgere, wy van ohnen ann der stede eynne mochtenn geledenn werdenn, oder by ohnnen inn der have Baltßhundt (de unns doch vonn dem vagde ingedaenn, wi ock voriges jares gebrucket) so lannge liggenn mochtenn, dat se alle ohre wahr gesletenn, und wedder segelverdich werenn. Midler wile wolden wy, ohne to vorfange, dar geringste nicht vann unnsernn gudernn vorkoepenn, up dat wy unnß unser schulde etwes naletenn, unnd vonn dem overigenn dat se nicht kopenn unnd inladen kondenn, etwes darna to behoff unnser frunde bekamenn mochtenn, is unns alle van ohnen unangesehen, de have unns bevorenn ingedann unnd van unns gebrucket worden, wy ock eynner borger gewesenn, ane jenich mitlidenn affgeslagenn, dat doch unnsers erachtenns, fremder nation schipper nicht geruhe by unnß beweesenn, dar se unns inn solchenn vordarff unnd unvorwindlichenn schadenn befunden, ock nicht gebrucklich eynn denn anderenn, uth siner bewilletenn unnd ingenamenenn have alßo to entsettenn.

Derhalvenn genodiget, vann dar up Norwegenn na Bergen to lopennde, unnd alßo ohne anderenn schadenn, unnser neringe unnd gewinstes, mercklichenn schadenn an unsenn guderenn geledenn, denn wy so nodich iuramento in litem mit gudem gewetenn, an verhundert daler, unnd with dar overich, woll estimerenn unnd erholdenn konnenn.

Dewile ick dann sampt minen schepesfrunden, also baven geloefflichenn gebruck aller schipvahrer, vann denn beclagten solcher have der wy inn mittinge gewest, wo ohnne bewust dusses jares entsettet unnd verweldiget, dar uth vorgemelten schadenn ock genamenn. So bidde ick upgedachte Johann Runge vann wegenn miner egenenn personenn, ock upgenanter miner schepesfrunde, de beclagtenn in solche verhundert daler, mick unnd minenn schepesfrundenn to erleggenn schuldich to spreckenn, unnd dorch i. e. w. richtlickenn uthspracke to condemneren, sampt allenn gerichts kostenn unnd fernerm interesse, ßo gerets darup ergangenn, unnd wider up dusse forderung ergann wert, oder ock sunst wat sick hirinne, mick unnd minenn mitklegerenn to mitte unnd fromenn solde oder mochte toerkannt werdenn, mittodelende, inn dem alle i. e. w. richterlich ampt underdenich unnd dennstlich anropennde.

Salvis ulterioribus.

Transcript by Bart Holterman, 2017