Quadruplica et conclusio Segebade Deitken und syner sampt boclagten, contra vormeinte ingelechte triplicen Johan Runge und anderen mitclegern.

Wowoll erbare und wolwise groitgunstige und gebedende heren, in negest ingewanten bestendigen und warhafftigen duplicen¹ ick, Segebade Deytken und myne mitconsorten alse beclagten unser unschult und gerechticheyt dermaten deducirt und dargethan hebben, dat uns nu mehr wat fernner inthobringen van unnoden. Idoch wile des unbesunnen angevengen und spitzens by dem jegendele noch neyn ende is. So werde wy ock nothdrengich verorsaket der warheit tho sture noch dussen satz den vorigen pro conclusione tho doinde.

Nemen hirup erstlich vor bekant an alles wat in negest ingekamener unerfintlichen triplicen² so uns tho gude kamen mochte vorhanden, wat darenbaven ingestrawett generalibus iuris affwisende.

Repetiren demena hirher van worden tho worden wat wy in gemelter gewisser warhaffter und unstrafflicken duplicen inbracht, und synt der van jegendeell upgefangenner vormeinten confession nicht gestendich mehr, den wat Johan Cordes den etlichen man, etwa unsen getruwen diener vorsyne person alleyne in dussen belangen doitt, alse dat he der tyt, do he noch under unsen broder gewesen unvorwarneter saken, und aver ales vorsehen hin derlistiger wise achter unseren rugge her, uns tho besundern schaden und vorfange sick ummede haven beworven den ock dergestalt expracticert eyn jarlanck innekregen und gebrukett, dat wy ut quando est facti nicht in aftreden syn konnen, noch willen.

Dat wy aver den haven und den orth landes darumme der stryt ist twey gantzer jar und mehr nicht gebrukett und alse guthwillich scholden vorlaten hebben (alse der jegendell avermal gerne erschnappen wolde und in dussem falle tho male grepisch ist), synne wy ohme nicht stendich und scholen dat nummer mehr wat maken noch erwisen, ist ock im negesten inbringen unbonenet und unvoranthwordet nicht gebleven hebben anders klegere de ogen by sich gehatt und der worde wahrgenamen, und is je unlogebar wahr alse ock dat mal ermeldet, dat unse vorfaren und wy nu aver de vertich jar herstedes dar im lant gehandelt und de lude jarlich mit gude versorgett heffen ob wy woll in alle der tyt neen twe jar dar schepe in den orth landes gebracht hebben, wo dan dat nu mall thom drudder gescheen alse unse frame knecht inn synen schepen dar kamen.

Sint also tho meyner tyt alse vermeintlich verbracht synnes edder willens gewesen und des orth landes und des handels darinnen tho usseren edder tho begeffen dat den uthe dem ock well affthonemen, dit wy noch woll in de achtehundert gulden schult dar im lanth der tyt alse mehr gedachter framer knecht so achter uns her gewesen gehat hebben, so he mit synen anhange uns tho groten vorderfflicken schaden we im vorigen producten wider vermeldet gestoppet und upgeholden. Und off he sick gerne darinne wolde exuseren alse hedde he solliches apenbar gedan, so ist dat doch frivole excusation angesehen he und unsen parteners do wy syner hinderlistigen breve tho Bremen in erfaringe gekregen, derhalven bepraken hefft he menlyk anthworde gegeffen wo he solliches dede, he wolde eyn schelen syn und mit neynem ehrliken manne uthe dem potte drincken wo solliches gemeint und van eme geholden, hefft he mit syner daett genochsam bewisett und ist uthedeme lichlick tho sporen wo willich wy den orth vorlaten hebben edder nicht, ist ock darmede Johan Kordes syne hinderlist apenbar genoch dewyle beromet werth, he hebbe id apenbare gedan. Dat ock angegeven wert alse hedden se de have bewynckopeth in meninge so lange de thohebben alse se dan liggen wolden, non sic impii, non sic probate hoc et vicesiis, wente ohre beromede bewiß bringet eyn anders mede und redet men van eynem jare namptlick de anno etc. 61 alse und dem thokamenden jare na dato der vorschreyffinge, do so hinderlistich achter uns her gehandelt, sunst hedden se sick woll idecke jare laten tho seggen, doch erret uns dat alles nicht ist onen wat tho gesecht und vorschreven moegen se sick holden laten. Wy hebben des baven der overicheit dar tho lande nen vorbeden off heten tho laven edder tho holden. Se hebben ock ane twyvell dat bescheet und anhtwort noch woll nicht vorgetten alsedat jar do se dar lagen und dem vagede in Hetlo volgeden und wolden lenger bewiß hebben do wusten se wol wo lange ohre hinder uns erlangede bewiß helt und holden wolde, sunst hedde ohnen wider ansoekens umme lenger bewiß van unnoden gewesen. Und wo se dat erlangte anthwortt woll angemerckett hedden, so worden se tho dertyt genochsam gewarschuwett dat wy se nicht (wo se nu seggen) warschuffwen hebben droffen. Berouwen derhalven up dussem unsem warhafftigen berichte den wy ock noch godt loff wol tho bekunschuppen weßen und im falle uns von dem heren richtere uperlecht wertt bewiß vorthobringennde dat de hovetvaget aldar des landes se dar im lant gewisett und se ock up andere orde und haven im lande weddergewisett, do ohnen dat tho gesechte jar ist geholden und do vor by geflaten, synt wy up kop van ungelick dat sulve tho donde unbeswereth.

Mit wat vorblomeden reden de jegendell ock inflicken alse plegen solliche contractus und vorschryvinge woll up den schippern off eynen anderen schepesfrunth gestelt werden etc., unde gan also under des tacite consensu der hinderlisten uns begr[?] vorby wolden id vele lever darhenne by den haren theen alse were Johan Kordes unses gewesennen framen knechtes name dorch unvorstandt des duders der sprake also dar in gesettett etc., dat synt avermals rencke und grave grep up der luten dan wy darvan eyn vel anders wetten und ist tho bewisende mit dem duder und schryveer, dat se ohme geheten hebben den namen thovoranderen, wo yn dissen ingelechten copien tho erste hende.³ Und dewyle solliches so falschlick jegen uns geschreven mach der clegere erhavene intent darup nicht prunden noch wy daruth jeniges weges condemneret und vordomet werden, cum sit certessimi iuris, quod falsitas nihil probet ut tot tit. ff. et C ad L cor. de fals. imo falsarius est et falsi poena lenetur non solum qui falsa scribit, sed qui et falso instrumento sive publico sive privato in iudicio utitur L iubemus C de probat. L ubi et L si falsos C de falss. L divus pivo ff. eodem. To deme willen ock de beschrevene key. rechte dat de so sich valscher breve in gerichte tho gebrucken understan dersake schollen vorlistich werden, ut est tex(tus) apertus in L.I.C. de poena iudicis qui male iudicavit etc. bart. L falsem C si ex fals iust.

Belangende unse warhafft vorbringenth dat Johan Kordes und hernn Dethmer Bredelo alhir ist beslagen, der orsake dat he frombde lude guder, alse mit namen Jurgen Otterstede, Lutke Blancken, Hinrick Wilkens, Jochim Kluver, Wolder Winckelman neffens synen gude vorhandelt uns tho nadele und schaden etc., welchen der jegendell ock eynen mantell de mit unwarheit gefodert ummehengen und seggen id sy der orsake gescheen dat he hir scholde borger werden etc. Nu ist sollechs eyn ungehortt dinck, welck ock eyn blinde upder wenth anders volen scholde, dat men jemandes dorch die anckrecht darhenne holden scholde, de hir im gebede nicht geseten borger tho werden. Daruth worde volgen dat alle buren im stichte Bremen in der graveschup Hoye off uth anderen orden, wen se hir beslagen worden, und unrecht wedder der stadt recht und gebruck gedan mosten borger werden, alsdenne were ohre mishandell mit sollicher borgerschup geslichtet etc., averst id hett nicht also, und werth hir ock so nicht thogeleten, derhalven wil dem jegendele ock van neder syn dat se den brill woll up setten und sehen off nicht de borger darde vorschriffunge upholt hen by den Ottersberge wanen, noch schall id nicht heten dele male off mit hinderlist achter uns gehandelt.

Und dewyle unse jegendele sick an unsen framen knecht Johan Kordes vormengett und ohme ohre guder up syne backbreve der he anderlude namen ingesettet gedan moegen se ohren waren soeken wy hebben ohrer guder nicht entfangen wes ohnen ock vorschreven moegen se sich holden laten wy hebben an nicht kamen heten noch vel weyniger urren.

Nachdem overst van den clegeren tho ewigen dagen ohre intent nicht kan bewesen werden dat se uns erdichtet thometen, so bidden wy demutich i.e.w. uns annder unrechtmessigen unbefugten ansprake vormeinten clegere tho alsolveren und ohnen perpetuum silentium tho imponeren mit erleggyng aller upgewenten rechtlik kosten darinne so uns vorgeselich in vil mehr moten willich gefoertt, willen hirmit im namen gods concluderet und beslaten hebben, i.e.w. und godt bevalen richterlich hoeichadelich ampt, demutich anropende.