Inn sackenn Johann Rungenn unnd sinen medeconsortenn clegernn wedder Segebade Deitcken unnd sinen mittvorwandtenn beclagten, hefft ein erb. radt de ingekamenen acta mitt flite dorchlesennde bewagenn unnd erkennen darup vor recht, dewile de cleger sick beromenn, dat de vagedt in Hittlandt Oleff Sinckeler ohne de have Balthesundt tho mehren alß einen jar ingedann, darup ock ein vorschrivinge deß vagedeß richtlick ingebracht. De beclagten averst darjegenn ingewenndet, dat se sulcke have ahnn de 40 jar hirbevor gebruckett, de se domalß derorsacke dat ohnenn vann dem vagede angemodett, se ein schip mehr alß se darinne gebracht, vortollen scholdenn verlatenn, unnd dat desulvigenn denn clegernn, vann dem vagede up ein jar, unnd nicht lengk thogebrucken ingerumett, deßenn ock sick up den inholtt obberurter vorschrivinge getagenn, dat de clegere solck ohr angevenn dat ohnen de have tho mehrenn, alß einem jar vorlaten, tho bewisenn schuldich vonn rechts wegen. Actum denn IIII martii anno etc. LXIII

Ericus Dunckerss h.