Replica Johann Rungenn und syner mitkleger, contra responsionem¹ Segebade Deitken unnd dessulvenn mittbeclagten.

Tho volge der inngebrachter schrifftlicher klage,² so ich Johann Runge als principall kleger sampt annderenn litisconsorten jegenn Segebade Deitkenn unnd seynne mitbeclagtenn ingewannt, unnd vernher up des jegenndels Responsion to hanndeln, anneme ick upgedachte kleger alle datjennige, wes my unnd minenn mittklegerenn dienstlich darinne befundenn, als vor i.e.w. richtlich bekannt, der averigenn averst, so miner petition to wedderenn ungestandenn.

Unnd segge fernher, nachdem de beclagtenn irhe product pro responsione sulvest intitulert, tho demme ihm ennnde dessulvigenn, ihrenn jegenboricht, unnd wath dusses falles recht, tho i.e.w. richtlicher erkenntnuß stellenn, mit anropinge des richtlichenn ampts, ohnne daraver mithtodelenn, unnd denn clegerenn inn dusser sack eynn ewich stillswigennt uptholeggenn, dat derhalvenn denn gerichtlichenn krich bevestiget, unangesehenn de patronus causae im anfange der responsion vormeldet, wo he sulchs nicht verantwordet inn willenn damit dem krich gerichtlich zuu bevhestigen cum actus contrarius prostestationi, tollat ipsam protestationem bewustes rechtenn.

Demnoch wert vonn my vor bekannt angenamen, dar de beklagtenn gestendich, wo ick unnd meynne consorten litis anno 1560, die have Baltezundt, vonn dem hovetvagde inn Hitlandt erlangett, item dat wy des folgenndenn jares unns dar inn gelacht, ahnne jemanndes vorhinderung gebrucket, derhalvenn my de ankumpst unnd besitt der have Balteßuntt tho bewysennde nicht noedich.

Datt averst vonn my unnd minenn mitklegerenn, solchs hinder denn beklagtenn her gescheenn, darahnne wertt vele milde geschevenn, dann de responsio, bringt am bockstave sulvest mit sich, wo se de have sulvest uth der orsacke vorlathenn, dat se vollenn tollenn geven scholdenn, unnangesehenn sie ein schip mynn dar gebracht dar uth die vorlating desulvigenn have sulffwitlich vonn ohnne gescheenn, apenntlich bekannt wertt, unnd dewile dem alßo, was dem hovetvagde in frey, solche have eynnenn annderenn wedder to vordoennde.

Tho deme moegenn de beclagtenn mit warheit nicht seggen dath se dathmall inn drenn jarenn ungefherlich, der have gebruckett sunder do se unvordann loß gelegenn, is nochmals Segeba Deitkenn beclagte, vonn dem hovetvagde gefragett, offt he ock de have inn Baltzundt wedder annhemenn, unnd vortollenn wolde, darup he dann geanntwort, nha genamenne berade, neynn he konde darnicht tho kommenn, idt were ohme doch genoch de anderenn have to vortollenn dar he lege. Derhalvenn so Johan Kordes itzige mitkleger, solchs vornamen, wo de have ßo lannge loß gelegenn, unnd van denn beklagtenn lange bevhornn vorlathenn, hefft he denn schipsfrundenn to gude, solche have vann dem hovetvagde gewunnenn unnd angenhamenn, nicht to eynem jar alleynn, wo de beclagtenn vormenenn, sunder alle dewile he unnd de syne dartho gehorich dar vann den tollen wo gewontlich enrichtedenn, wo dann de vorschrivng des kemeners Oloff Synckelers vormeldett, der wy hir by eynne vordurschede copyen, neffenns dem orienali avergeven.³

Dat averst des jares 1561 darinne gedacht, is unnd kann, dem gebruck nha, nicht anders verstandenn werden so vann undechtigenn jarenn aldar mit denn havenn geholdenn, dann datt dem schipper up dat jar, erstlich aldar to liggenn vorgannt, unnd volgends, alle dewile ohme geleve, so vernhe he synenn tollenn entrichte unnd betale, nha gebruck des lanndes, unnd alß anndere frembde uthlandisch donn (dann dat sind de worde der vorschrivinge) ock als solchs geevharenndenn kopludenn tho gehorth etc.

Nu khann nicht gesagtt werdenn, dat aldar jennige have ßo eynn mhall vann dem vagde bewinkoptt, avermals des volgenndenn jares, unnd alßo alle jar mote bewinkopet werdenn. Ock unngehort datt de schipper oder de kopmann der eynmall bewinkoptenn have juwerle entsettet sy to jenigenn tidenn, so verne he alle jar synenn tollenn enrichtett, oder sunst solchs nicht vorwerckett offt sulffmodich upgifft unnd vorleth, wo de beclagtenn de stridige have bevornn sulffmoedich verlathenn unnd upgegevenn hadden, verweniger bevindlich, dat eynner frembder nation schipper, denn anderenn uth syner bewynkopttenn unnd ingenamennenn have, to jenigen tydenn entsettet unnd uthgemedett hebbe, gleich wo dannoch dusse beclagtenn, vnns de wy eynner nation, ja eynner stadt borger seynn, dath mach woll hinder eynnem her hanndelnn hetenn, dat de jegenndell uns annderenn gernne (wowoll mit allem ungrunde) tho metenn woldenn.

Uth welchem alle, alß nomptlich uth denn hellenn bockstavenn der vorschriving, unnd uth der gewonnheit affthonemenn mit wat ungrunde, de jegendell sick understandenn, unnse bewinkopte have, unns up eynn jar alleyn to breckenn darmit se irenn an unns gewantenn motwillen wormit bemantelenn. Unnd wolde warlich allenn schippernn unnd schepesfrundenn eynn grot nochdell gevenn, so des orts segelenn, wenn se irer have der gestalt alle tidt mochtenn entsettet werdenn, ja ohnne sulvest woll hartt unngelegenn synn, ßo se jarlichs derglicken erwardenn mostenn.

Thom anderenn dat de beclagtenn, my unnd de anderen mitkleger, up denn hovetvagt Oloff Synckeler, darvann se de have scholenn bekommenn hebben, gerne worwysenn woldenn geschut gar unbillich, dann wy klagen darup, dath ohnne nicht geborett hedde, unns de wy eyner stadt borger, de se ock gewetenn mit der have begunstigt unnd wo dar gebruchlich, berechtigt geweßenn synn, darbeneffenns ock onn besitte gehadt, dermathenn uthtokappenn unnd to entsettenn, dat vorhenn nemandes bejegnett, unnd alßo volgennddts in solchenn unvormitlichenn schadenn to vhorenn, dar ohme beter angestandenn wenn se gerets voege dartho gehadt, unns thom geringsten als irenn mitborgernn, vor unnsenn schadenn to warnen, als dat se unns ungewharnett darhenn segelenn lathen, dartho inn keynner have des orts geduldenn willen, welckerglickenn des orts, doch vann keynner frembdenn nation jenigem schipper weddervharnn, unnd by allenn erbarnn schippernn ungehoert iß.

Tho deme wert vorgegevenn, als solde unns vann dem vagde, noch sunderliche barmherzigkeit daranne bewisett synn, so he unns inn ander have als Schalewage, Lassevorde, Brusundt^a gernne vorwisenn willenn, warlich eynne gude woldaet, eynnenn darhenn to wisenn, dar gerets mher eeber als poggenn wherenn, unnd de gerets dar legenn, vann Hamborgernn unnd Bremernn, konden ohre schult nicht darkrigenn, wat scholde unns dann dar vann geworden synn, de wy dar keynne schult hadden, ock de anndernn sunst nicht gestadet hedden.

Hebben derhalvenn notwendich up Norwegen na Bergenn lopenn motenn, wo gescheen, wat mogenn sich dann de beclagtenn unnderstann, so unngerimpte dinge vorthogevenn, als heddenn wi ohnne ohre schult des orts gesloppett, so wy se ja tom geringstenn vergenns ahnne verhindernn konnenn, oder mogen, wenn wy gerets gewolt heddenn, de wi dar nicht kopenn oder verkopenn mochten. Unnd is entlich uth all orem handell, denn se hinder unns dermatenn her gerevenn, ohre motwille tovormercken jegenn aller loefflicher seevharer gebruck unnd gewonheit, so bißher aldar niemannd der gestalt denn andernn, uth synner wolangebrochter have, der he inn besitte gewesenn, so kleglich ungewharneter sache entsettett unnd tho synem unvorwindlichen schadenn, so jemerlich uthgewuppett hefft, wo my unnd mynenn mitklegernn, von ohme weddervharenn sunderlich vann denne, de wy unnder i.e.w. eyner stadt geswornne borger synn.

Bidde derhalvenn noch wie vor libellando denstlich gebedenn inn recht to sprechenn, unnd vherner hirinne (angesenn de kriges bevhestung geschenn) ergaenn to laten, watt sick sunst to rechte will egenn unnd geborenn.

Vernher nodtrufftt vorbeholtlich.