Triplica et conclusio Johan Rungenn unnd anderer mitklegere, contra de vormente duplicen Segeba Deitkenn unnd syne samptbeklagtenn.

Der unbestendigenn duplicen Segeba Deitkenn¹, wormit sick de vorstrickede voes gernne uth dem nette rythenn wolde, vherner to bejegenn, seggen de cleger dat sick de eynmall richtlich bekante warheit nicht so slicht vordusternn latenn will oder kann, dorch eynn nichtich wedder ropent, des jennigenn wes vorhenn nicht muntlich, sunder ock na langem berade, up dat poppir ingebracht, unnd also iudicaliter is bekannt wordenn.

Derhalvenn de klegere nochmals alhir willenn erhalet hebbenn, wes replicando² vann jegendell gesatt unnd bekannt angetagenn, unnd pro confesso angenamenn worden. Wes erstlich, dat de beclagtenn sulvest denn klegerenn ire rechtmetige ankumpst, der have Baltezunt bekannt. Thom anderenn, wo de cleger anno 1561 de have rowsamlich gebrucket. Thom drudden, wo se, de beclagtenn, solche have gutwillich vorhenn vorlatenn.

Dann dat solchs alle vann ohnne den beclagtenn mit uthgedruckedenn wordenn bekantt, uthwisenn de wort irer responsion,³ dusses inholts, seggende dat wy woll nicht ahne, dat kleger der weniger tall anno 60 sick by dem hovetvagde unnd kemener inn Hytlant, umme eynne have Baltezunt gehetenn in Unsthe gelegenn (welcker wy tovornn lange tidt gebrucket, dat mal aver dewile wy eynn schip weniger dar inn gebracht, unnd gelickwoll fullenn tollenn gevenn scholdenn, gelaten hadden) hinder uns her beworvenn, denne ock erlanget, unnd volgendes, dat 61 jar, sick darinn gelecht unnd des ane jemandes vorhinderung, tho ohrenn bestenn gebrucket etc. Dith sint even de worde in orer responsion entholdenn.

So nu de beclagtenn sulffwillich de have vorlatenn, ock twe gantzer jar unnd mher nicht gebrucket (deß se sulvest nicht benenenn, dann se idt nicht vorantwordet), wo mogenn se denn eynenn andernn vordenckenn, de umme solcke vorlatenne have geworvenn, bewinkopet wedder angenhamenn unnd gebrucket, welck dat maell inn der vorlatennenn have eynen idern frye gestanden.

Dewile dann solchs vam jegendele bekannt, is vann dussem alle dem cleger ichteswes to bewisenn unnodich, unnd is nu mehr vorerst de frage, offt de vorwilligung, so vann dem hovetvagde Oloff Synckeler, up de have denn klegerenn gegevenn alleynne up eynn jar to treckende, wo idt de beclagdenn gernne woldenn gedut hebben, thom andernn offt denn beclagtenn gebaert, also de klegere uth ohrer bewinkopedenn unnd angenamenn have, jegenn alle seevharer lofflickenn gebruck, hinder ohnne her toentsetten, unnd volgendes, also listichlik stilleswigendes, inn unvorwintlickenn schadenn thovoren.

Up dat erste beropenn sich de cleger, up dat orienal der vorpitzerdenn vorwilligung Oloff Synckelers⁴ gerets by denn replicis averantwordet, darinne eynn erbar radt, jenige exclusivam oder limitativam clausulam, nicht vindenn wert, darmit denn clegerenn solche have alleynne up eynn jar sy averandtwordet, sunder de bockstaff unnd mening des contracts, wert velemher dat jegennspell uthfundich macken, so darinne gesatt is, mach alhir syne kopenschup vorhandelenn, gelick wo de andernn Bremer, oder syne landeslude doen dewile he synenn tollenn uthgifft unnd betalt, als geboerlich unnd gebruck is, dat is indefinite geredet, donec vel quo usque solverit.

To deme so de vorschivinge eynner gewonte und gebrucks gedencket, is solchs woll to behertzigenn, dat ann dem orde nie gehort, vele weniger eynn gebruck gewesenn, dat eynner uth syner bewinkopedenn unnd ingenamenenn have, na vorlop eynnes oder mehr jaer, vann eynnen andernn schipper, jegenn synenn willenn, stilleswigendes moge uthgedrenget unnd hinder ohme her uth gekofft werdenn, wo dussenn clegerenn moetwillichlick to ohrenn vorderve, vann denn beclagtenn allene unnd nemandt anders gescheen und bejegent is.

Unnd bedarff sollich gebruck kenes bewises, dewile dat jegenspill vann denn beclagtenn nicht kann dargedaen werdenn, dat jemande solchs wedderfarenn, ock sunst hir binnenn und butenn Bremenn, allenn seevharendenn (so des orts segelenn), wol bewust, welcks de beclagtenn darmede sulvest wol bekennen, so se jegenn stilleswigennds gevulbordt, unnd sunst ovelick, quod publica et notoria non egent probationibus.

Ock sunst noch der gemenenn vornunfft, daruth wol to ermetenn, dat de have offtmals werden^a bewinkopett, twe offte dermall durer denn se jarlichs vortollet werdenn, wo dann ock de klegere dusse have mitt teyn engelotten unnd 3 daler bewinkopet hebbenn, jedoch jarlichs vor de have nicht mer alse 6 engelotten unnd 1 daler to tollenn gevenn scholenn, offt dat sulve nu umme eynnes jares willen gescheen, wert i.e.w. wol gunstichlich bedenckenn unnd beherzigenn.

Up denn andernn hovetpunct darup de clage itzt berowet, offt denn beclagtenn dermatenn wo gescheen, by denn klegerenn to handelenn geboert hebbe, wert se ohr egenn gewetenn woll lerenn, so se ungernn sick sulchs vann eynnem andernn weddernharenn laten, sunderlich dar se bekennen, wo se gutwillich vorhenn de have averlatenn. Unnd to deme war dat de have twe jarlannck ungebrucket vann ohne, stille gelegenn, unnd nach dem se de kleger wedder inn genhamenn, also balde stilleswigendes, des volgendenn jares, vann ohnen dersulvigenn also kleglich entsettett wordenn. Welcks des ordes nue gescheenn, oder ock vann frembdenn jenigem schipper nicht weddervarenn is, ick geswige den dat de eynne borger dem andernn dermatenn natrachten scholde, wo unns denn clegernn gescheen.

Wat nadels, vorderves, unnd schattinges, hir uth ock dusser gudenn stadt, schippernn, unnd allenn schepesredernn, erwassenn wolde, so dergelickenn eyner denn andernn, uth syner have uthtosteckenn, vorgannt wolde, wert i.e.w. wo ider ehr levende seevharende mann, wol behertzigen, unnd dewile idt nuewerlde gebrucklich gewesenn, sulchenn unraet mit boerlicher straffe, darmit eynn ander dergelicken to donde schewe dragenn moge, vorkamenn.

Und offt darmit der hovetsacke woll genoch gescheenn, dat alle nottrufft, uth des jegendels egenn bekentniß wargemacket, averst dat de jegendell nicht gedencke, ohnne sy up ohr extravagerent, upsetlich derhalven nichts geantwordet, als dat de kleger daranne schewe droegenn. Secht erstlich Johann Cordes, up solchs ohr smehelich angevent, als hedde he hinderlistich umme de have gefordert, dat ohme sodanes mit gesparter warheit, averdichtet sy, unnd mogenn solchs sulvest inn ohrenn bussem steckenn.

Dann der beclagtenn resonsion bringet sulvest mit sick, wo se, de beclagtenn lange sulffwillich de have vorlatenn haddenn, wo konde dann jenich hinderlist, vann Johann Cordes daranne gebrucket werdenn, averst wo se sulvest by denn clegerenn, in aller geswinder hinderlist gehandelt, bringet de apentlicke daet mit sick also dat se des sulvest nicht benenen mogenn, wenn se gerets gernne woldenn.

Dat se ock dat orienal des vordrages begerenn, mogenn se besichtigenn, is gerets vann unns ingelacht cum replicis, wenn de jegendell anders darup achting gehat, offt averst de rechtmetich vordutschet, stellenn de kleger to denn erfarnerenn der spracke, de wy biddenn eynn erbar radt darby kamenn latenn wille, unnd beropen sick ock de klegere, up dat orienal, wo gebrucklich, derhalven idt ingelacht.

Und fherner iß eynner under denn klegernn, gerets nyn geswarenn borger, wat drept solchs doch de anderenn mitkleger ann, de beedede borger synndt.

So werdenn ock solche contractus, wol up denn schipper oder eynnenn der schepesfrunde gestalt, jedoch geet de handell ohnne allene nicht ann, sunder den gemenen schepesfrundenn, alse dusse samptklegere befundenn, wat mangelde dan in dusser klage, offt gerets de orienal contractus, nicht up Beleckenn, sunder up Johann Cordes gestalt were, so hefft ock Johann Cordes allene nicht darumme gefordert, sunder Johann Baertscher (der eynne mitkleger), de lange jaer bevornn, by Johann Ballers tydenn, de have mit gebrucket hadde, de ock darup vann unns anderenn benhell gehadt, dewile de have unvordaenn se to unser aller framen to erlangen wo gescheenn.

Dat averst de jegendell derhalvenn allerley ungelimp up Johann Cordes drengenn woldenn, dat he keynn borger, allerhande gudt vorschepet, villichte unvortollet, wo de beclagtenn gissinge macken geschut ane voege unnd alle billicheit, dan he nichts vorschepett oder vorhandelt, darvann eynnem erbarnn rade dat ohre nicht gewordenn, unnd wil ock darup einem idern voet holdenn, unnd nottruftige antwort gevenn, wor he des bevordert wert.

So hefft ohnne ock her Dethmer Bredeloe, up synn gruntlich bericht, nergenns umme wider beclagett, wowoll he vann synenn mißgunnernn velschlich genoch angedragenn, alleyne isset war, dat he noch nin geschwarenn borger, averst datmael by her Dethmer Bredeloe, derhalvenn inn underhandling gewesenn, ock nue vorwegerich, dar he vam upgedachtenn hern Bredeloe, wider darto gefordert, unnd ohm geborlichs darto gestadet wurde, synenn borger eedt to donde, averst offt darmit de jegendeel, syne sacke woll vorantwordett, dat to der sacke gar nicht denstlich is offt synn kann, wert eynn halffwitziger wol gedencken. Dann idt ßint daruth, noch dem se jegenn de warheit dusses handels, nicht bestendigs upbringen konnen, mostenn se dannoch ihr hitzigk gemote, jegenn de kleger mit dergelickenn unnuttenn gedichtenn, up dat poppir bringenn.

Wo dann ire unnutte unnd ungerimpte vorantwordung, alleynne ock daruth tovornhemenn, dat se de cleger up Oloff Synckeler gerne vorwisenn woldenn, noch deme se ohre mißhandlung nicht benenen konnenn, dann solchs gelt hir min alse nichts, wy klagen wo unns de beclagten also hinderlistich umme unse bewinkopede unnd ingenamenne have gebracht, darto mit eynnem worde nichts darvann vorwittiget, updat se unns ja so motwilligenn, volentes et scientes, inn unvorwintlichenn schadenn brachtenn, wo gescheen, dann hedden se mit ohrer hinderlist, dergelickenns nicht understandenn, were wy cleger by unnser have, de wy inne haddenn geblevenn, denn schadenn volgends ock vormeden dar se alleynne orsacke to gegevenn, unnd nemant anders, derhalvenn ock allene to beklagenn.

Derhalvenn biddenn kleger noch wo vor, de beclagten nicht allene unns klegerenn to gude in de angetagene 400 daler to condemneren als genamenne schadenn dar uns de beclagten motwillich ingevortt medio iuramento so nodich, woll to estimerenn, sampt andernn gerichtkostenn unnd schadenn, sunder ock inn geboerliche straffe to nemende, darmit andere dergelicken to donnde geschewett, unnd sust wat recht unnd billich synn wert mit to delenn. Wo clegere dann hirmit tom entordell sluterende i.e.w. richterlich ampt denstlich anropenn, und stellennt to erkentnuß des rechtenn.

Salvis quibuscumque iurium suffragiis.