Erbarn hochgelarte achtbarn und wolwißen grodtgunstigen hern. I. e. w. ßym[!] myne bereitwillige schuldyge und gehorßame deenste, alletyt thovoren hochwiße hern. Idt heft my der erbare und wolwiße here Joachim Bekendorp ut bevele eynes erbaren rades eyne poppiren schrift¹ thogestellet, daryn ick geleßen und befünden, dat Berendt Loeßekanne und Christoffer Meyer, borgere tho Bremen, van der ko. matt. tho Dennemarcken etc., vor etzlichen jaren, mit der haven Ostfoerde yn Ißlandt ßambtt der gantzen suessellen, deßulvigen mit ehren schepen und wahren jarlykes thobeßoeken, und eren handel und kopmanschaft jegen errichtung des olden gewantlichen tollens thodryven, gnedigest voerßeen, und begnadet, dat ße ßolcker haven ane mennichliker vorhynderinge und eyntrages by vormydung ihrer kon. matt. ßweren ungnade frig gebruken und geneten moegen alles ferner inhalts irer matt. ihnen hyraver gnedigest mit gedeilter vorschryvinge. Und derhalven yn ehren der borgere tho Bremen, angevende my Matthias Eggers, an i. e. w. beklagedt, dath ick ßambt den mynen, aldar jarlikes geßegeldt und deßulvigen haven mit und benefenß den Bremern besocht, und dardorch marckliken schaden geleden ßy ßyk doen beroemen, unde angeven, und entliken ere grundt und meyninge darhen gerichtet dat ick und de mynen uns derßulven suesßell unde ordes entholden schall. Darup ick dan i. e. w. uppet eintfoldigeste nicht thovorhalten, ßunderen mit guedem waren grunde, den bericht dho, dat myne voerfaren, ßolange luede gedencken moegen, inßunderheit Hans Hartiges, dede yn godt ßelichlikenn rouwet vorlangest mer alße veertich jarlanck gemelte suessell beßegeldt. Item Hans Tynßdael, Roleff Hummelßen ßeliger, und Berndt ßalfeldt darnach ick myt den mynen, lange tydt heer unße hanteringe und kopmanschap aldar gedreven unde wen wy der kon. matt. voegden und bevelichhebberen, aldar yn Ißlandt, jarlicken geboerliken tollen vorrichtet und averantwerdet, ßynt wy ferner ansprake, van ohenen entleddiget und quitert worden, derhalven de Bremer keyn hersehent noch vorbodt edder gebodt, aver uns gehat noch hebben, ßyndt enen des allen, mit nichte, ock gestendich. Unde baven dat, ßo hebben wy der ko. matt. tho Dennemarcken breff und ßegell, ock mit eigener handt undertekent, und ummetrent twe jarlack in date stande, darynne my mit sambt den mynen frig steydt, unße handterynge yn Ißlandt thodryvende, alle haven frig, buten bescheyden deßulvigen ßo kon. matt. vor ßyck beholden, ßunsten averst keyne vorbaden, thobeßegelende etc. Wen aver de Bremer syck dysses alles anders vormeynenn hoegere gerechtigheit in Ißlant, und gemelter ßussel alße wy thohebbende, szo stellen wy, unße byllike nodttroft an hochgedachter kon. matt. bevelhebbern, voegden, und alle der jennen, ßo aldar rechtes vorwalter ßynt, deßulven uns tho ider tydt, dar wol ynne scheyden weerden, welckes wy i. e. w. underdenigest, thom fruntliken antworde, nicht hebben moegen, vorentholden. Datum den 25 january anno etc. 80.

Juwen erbar wißheiden gantzwilligere

Matthias Eggers, sambt ßynen frunden und rederen.