Wolgeborner unnd edler graff, e. g. sein unnsere willige diennste mit fleiß bevor, gnediger herr. Weß die samptliche rhedere unnd schiffsfreunde seligenn Johan Munstermans auf e. g. unterthanen Joachim Kollings furgebrachte supplication,¹ alß auch e. g. daruber an uns gelangte gnedige befurderungsschriffte,² von wegenn by der kon. matt. zu Dennemarckenn erhaltener begnadigung der schiffart auf die haven Kummerwogenn in Ißlandt³ (nachdem [....] nach verlesung desselbigenn ihnen solchs zugestalt) zum gegenbericht uns, widerumb angebracht, danebenn auch [dienste und] diemutiglich suchenn unnd bitten thuen, das alls haben e. g. auß eingelagter der unserenn supplication,⁴ nach der lenge, gnediglich zuersehendt.

Wan dan nhun wir uns zuberichten, was gestalt die unnsere nicht allein auff hochstgedachter kon. mat. zu Dennemarck unserm allergnedigsten hern, durch unsere undertanigste beffurderung, bey erlangete begnadung, sondern auch bey irer mat. vorffahren hochloblichster gedachtnus zeitten eine geraume zeit hero, so weit sych menschlich gedencken erstrecket, die bemelte haven Kummerwagen besieglett,⁵ dieselbenn auch, ohn angesehen sie solcher schiffart halbenn nun etzliche jar hero grossen schaden genommen,⁶ also auch das irer etzliche je .... verloren und ire armen wittwen und weisen in grossen bedruck und elend hinder inen verlassen, dannoch und nichte de weiniger solche haven her und allemahl mit allerhandt commercien unnd kaufmanns wahrenn seidhero notturfftiglich vorsehenn unnd versorget. Daher dan wir unns keinen zweiffell machenn, da hogstgedachte kon. matt. bey zeit e. g. unterthanens [...] suchen auf deßelben beygebrachten bericht dessenn erinnert, i. kon. matt. wurdenn solch e. g. unterthanens suchen nicht gebilligett, sondern viellmehr mit so hoch betruebtenn wittben unnd weysen, neben unns, ein christlichs mitleit tragen (wie dan auch zu e. g. selbst wie, an stat der in so grossen betruck und sorgen verlassenen wittwen und waisen, uns nicht weiniger getrosten), und demnach sie bey dabevor erlagter kon. begnadigung gnedigst geschutzet haben unnd gehandthabet etc.

Alß bittenn wir dienstlich e. g. obgedachtenn irenn unterthanenn hirauf der billigkeit moge bescheidenn, unnd die versehung hirinne thun, das die unsere bey ihrer althergebrachter befreyung, und bestettigter begnadigung ruwiglich zulassenn, unnd die armen wittiben in ihrem wittbenstandt weiter nicht mugen betrubett werden.

Das versehen zu e. g. wir uns dienstlich, unnd seint es umb e. g. (die wir hiemit gott dem almechtigen in grafflichenn wolstande, unnd frolichen leibs gesundtheit lang zufristen empfelenn) zuvordienenn willig. Datum unter unnserer stadt secret den 14 april anno etc. 80.

Burgermeistere und raht der stadt Bremenn etc.